Býður langlokur fyrir ógreidd fasteignagjöld

 „Ég hef ekki verið í neinu rifrildi og hasar við bæinn og nenni því ekki en ég hélt að þarna væri ég að koma með skemmtilega tillögu,“ segir Hjörtur Aðalsteinsson, eigandi skyndibitastaðarins Super Sub, sem bauð Kópavogsbæ að fá matarmiða í staðinn fyrir ógreidd fasteignagjöld.

„Nýbýlavegurinn var fluttur fjær húsunum í hitteðfyrra og það skaðaði okkar rekstur alveg gífurlega. Í fjóra daga urðum við að loka staðnum og það voru endalausar lokanir og þrengingar. Salan á staðnum bara hrundi meira og minna þetta ár sem framkvæmdirnar stóðu yfir,“ útskýrir Hjörtur forsögu málsins.

Hjörtur telur ósanngjarnt að eigendur fyrirtækja við Nýbýlaveg þurfi sjálfir að bera allan skaða af gatnaframkvæmdunum. Hann hafi margítrekað beðið bæjaryfirvöld að koma til móts við hann með einhverjum hætti. „Það var bara ein hugmyndin að þeir keyptu af okkur matarmiða fyrir ákveðna upphæð. Það væri ekki verið að gefa okkur neitt heldur væru miðarnir notaðir fyrir starfsmenn bæjarfélagsins sem gætu kannski borðað hjá okkur einu sinni eða tvisvar hver,“ segir hann.

Þá segir Hjörtur að til hafi staðið þegar Nýbýlavegurinn var opnaður formlega aftur að efna til skemmtunar og bærinn myndi borga heilsíðuauglýsingu til að glæða að nýju viðskipti við fyrirtækin, sem sum hver hafi tapað miklu og önnur jafnvel hreinlega farið á hausinn á þessu tímabili. „Það varð aldrei,“ segir hann.

Hjörtur bendir á að sams konar ástand hafi skapast annars staðar, til dæmis á Laugavegi og á Skólavörðustíg. „Bæjarfélögin rukka bara fasteignagjöld fyrir atvinnuhúsnæði sem er ekki í lagi og við eigum bara að borga og brosa,“ segir eigandi Super Sub. Hann bauð Kópavogsbæ um 400 matarmiða fyrir 400 til 500 þúsund króna skuld.

„Þessu var bara hafnað en mér fannst þetta ákaflega kurteis leið og hófleg.“

Að tillögu Páls Magnússonar bæjarritara hafnaði bæjarráð tilboði Hjartar. „Ekki væri fyrir endann séð á því ef Kópavogsbær tæki upp á því að innheimta álagðan skatt með vöruskiptum og einnig vafi á því að lagastoð sé fyrir slíku,“ segir í umsögn bæjarritarans.

gar@frettabladid.is