Ferdinand: Enginn öruggur með sæti í landsliðinu

Varnarmaðurinn Rio Ferdinand hjá Manchester United og enska landsliðinu segir að baráttan um sæti í landsliðshópi Fabio Capello sé gríðarlega hörð og raunar sé enginn leikmaður sem geti verið viss um að vera með í hópnum fyrir lokakeppnina í Suður-Afríku næsta sumar.

„Landsliðsþjálfarinn hefur kallað til nokkra leikmenn í landsliðshópinn sem ykkur fjölmiðlamönnunum hefði ekki einu sinni dottið í hug að gæti komist í hópinn. En þeir hafa komið inn og staðið sig vel og ég held að enginn leikmaður enska landsliðsins geti verið viss um að hann komist á lokakeppnina.

Það er því mikil samkeppni í hópnum og þó svo að þú viljir ekki að sá leikmaður sem komi inn í liðið fyrir þig standi sig illa þá viltu ekki heldur að hann standi sig betur en þú og því verða menn að vera á tánum," segir Ferdinand á blaðamannafundi fyrir leikinn gegn Úkraínu en Englendingar hafa unnið alla átta leiki sína til þessa í undanriðlinum.