Ekki þrýst á Kinnear

Forráðamenn Newcastle eru ekki reiðubúnir að leyfa Joe Kinnear að snúa fyrr til starfa hjá félaginu en áætlað hefur verið.

Kinnear er nú að jafna sig á hjartaaðgerð og hefur stefnt að því að snúa aftur þann 11. apríl er Newcastle mætir Stoke City á útivelli.

Derek Llambias, einn forráðamanna Newcastle, segir að Kinnear muni ekki snúa aftur nema hann sé tilbúinn.

„Joe vill ólmur byrja aftur að vinna en við verðum að sýna skynsemi. Við þurfum að halda aftur af honum ef eitthvað er því hann er svo kappsfullur. Það gengur ekki ef hann er hopppandi á hliðarlínunni."

Llambias sagði enn fremur að það væri ekki rétt að endurhæfing Kinnear hafi gengið illa.

„Hann lítur vel út og er sterkari."