Neville íhugar að hætta alfarið í boltanum

Gary Neville, leikmaður Manchester United, segir að vel komi til greina að hætta alfarið afskiptum af knattspyrnu þegar hann hættir sem leikmaður.

Hann hefur síðustu sautján ár leikið bæði með Manchester United og enska landsliðinu en hefur síðustu ár mikið verið frá vegna meiðsla. Hann er 34 ára gamall og viðurkennir að hans bestu ár í boltanum sé lokið.

Neville hefur aflað sér þjálfararéttinda síðustu ár en er ekki viss um að hann ætli sér í þjálfun eftir að hann leggur skóna á hilluna.

„Það er partur af mér sem segir að ég ætti að halda áfram í boltanum en partur sem segir að ég ætti að snúa mér að einhverju öðru," sagði hann í samtali við enska fjölmiðla.

„Ég hef verið að afla mér þjálfararétttinda en hvort einhver vill fá mig sem þjálfara eða knattspyrnustjóra veit ég ekki."

„Þannig að ég veit ekki hvað tekur við. Mér finnst að það sé eins og að kasta sér fram af björg að hætta hjá Manchester United. Ég vona bara að ég finni eitthvað sem ég mér finni skemmtilegt að gera."