Mars var mánuður Liverpool í ensku deildinni

Það kom kannski ekki mörgum á óvart að Liverpool fékk bæði mánaðarverðlaunin í ensku úrvalsdeildinni fyrir marsmánuð. Steven Gerrard var valinn besti leikmaðurinn og Rafael Benitez var kosinn besti stjórinn.

Steven Gerrard átti einstakan mánuð þegar hann leiddi endurkomu Liverpool inn í titilbaráttuna. Gerrard lagði upp fyrra markið fyrir David Ngog í 2-0 sigri á Sunderland, skoraði eitt markanna í 4-1 sigri á Manchester United og gerði síðan þrennu í 5-0 stórsigri á Aston Villa.

Rafael Benitez er fyrsti stjórinn á tímabilinu sem er kosi besti stjóri mánaðrins í annað skipti en hann vann þessi verðlaun einnig fyrir október. Liverpool vann alls þrjá deildarleiki marsmánaðar með markatölunni 11-1.

Þetta er í fimmta sinn á ferlinum sem Steven Gerrard er kosinn besti leikmaður mánaðarins sem er nýtt met. Hann var einnig kosinn í mars 2001, í mars 2003, desember 2004 og apríl 2006.

Benitez hefur fjórum sinnum áður verið kosinn besti stjóri mánaðarins eða í nóvember og desember 2006, í janúar 2007 og svo í október í fyrra.