Menntamálaráðuneytið skoðar atvinnumál og námsframboð fyrir sumarið

Hópur á vegum menntamálaráðuneytisins skoðar atvinnumál og námsframboð fyrir framhaldsskólanema og stúdenta í sumar. Þetta segir Katrín Jakobsdóttir menntamálaráðherra.

Í bréfi sem Stúdentaráð Háskóla Íslands hefur sent Kristínu Ingólfsdóttur rektor skólans kemur fram að ráðið telji að stór hluti þeirra 13.500 stúdenta sem stunda nám við Háskólann muni ekki ná að verða sér úti um sumarvinnu. Því hvetur ráðið rektor skólans til að endurvekja sumarannir við skólann.

„Þetta er hugmynd sem er búið að vera svolítið uppi hjá okkur og við viljum auðvitað skoða," segir menntamálaráðherra. Hún segir að í menntamálaráðuneytinu sé hópur að skoða bæði atvinnumál og námsframboð. „Þannig að þetta er til skoðunar," segir Katrín. Katrín segir að menntamálaráðuneytið sé í samstarfi við iðnaðarráðuneytið að skoða hvort það séu einhver verkefni fyrirliggjandi sem hægt sé að fara í og eyrnarmerkja sumarstörf fyrir stúdenta. „Og við erum að skoða þetta líka fyrir framhaldsskólastigið," segir Katrín.

Hún bendir þó á að framhaldsskólanemar og háskólanemar séu ólíkir hópar og því þurfi að meta hvað hægt sé að gera fyrir hvern hóp fyrir sig. Hún býst við að komin verði niðurstaða í málið eftir um það bil tvær vikur.

Fréttastofa hefur ekki náð tali af Kristínu Ingólfsdóttur í kvöld.