Tvö mörk á síðustu átta mínútunum tryggðu Blackburn sigur

Blackburn vann 2-1 sigur á Tottenham á heimavelli sínum í ensku úrvalsdeildinni og náði þar með í gríðarlega mikilvæg stig í fallbaráttunni. Hollendingurinn André Ooijer skoraði sigurmarkið á 89. mínútu.

Robbie Keane kom Tottenham í 1-0 með marki úr vítaspyrnu á 30. mínútu og langt fram eftir leik stefndi í ekkert annað enn útisigur Tottenham.

Tottenham missti hinsvegar mann af velli á 80. mínútu þegar Wilson Palacios var rekinn af velli fyrir að fá tvö gul spjöld með mínútu millibili. Það tók Blackburn aðeins tvær mínútur að jafna leikinn.

Benni McCarthy jafnaði leikinn fyrir Blackburn á 82. mínútu og sjö mínútum síðar skoraði André Ooijer sigurmarkið af stuttu færi eftir hornspyrnu þar sem markvörður og varnarmenn Tottenham sofnuðu algjörlega á verðinum.

Blackburn hækkaði sig um fjögur sæti með þessum sigri og er komið upp í 13. sæti með jafnmörg stig og Bolton. Staða liðsins gæti þó breyst þegar hinir leikir dagsins klárast en engu að síður tókst Blackburn að fjarlægjast nokkuð fallsætin með þessum góða sigri.