Mutu verður ekki valinn aftur í landsliðið

Rúmeninn Adrian Mutu virðist ekki vera búinn að brenna sig nógu oft á því að lenda í vandræðum utan vallar því nýjasta uppátæki hans hefur orðið til þess að hann verður ekki valinn aftur í landsliðið.

Mutu sást á diskóteki nokkrum dögum fyrir leik Rúmena og Serba sem Rúmenar töpuðu, 5-0.

„Svo lengi sem ég þjálfa þetta lið þá mun hann ekki vera valinn í hópinn. Það eru hreinar línur," sagði landsliðsþjálfarinn Razvan Lucescu sem virðist harðari í horn að taka með skemmtanir landsliðsmanna en sumir þjálfarar.

Framkvæmdastjóri knattspyrnusambandsins styður þjálfarann og segir Mutu ekki bera neina virðingu fyrir treyju landsliðsins.