Brasilíumenn eru komnir í undanúrslit

Bandaríkjamenn voru engin fyrirstaða fyrir léttleikandi lið Brassa í Álfukeppninni sem nú stendur yfir í Suður-Afríku en lokatölur urðu 3-0.

Brasilíumenn tryggðu sér með sigrinum í undanúrslit mótsins.

Felipe Melo opnaði markareikninginn fyrir Brasilíu strax á 7. mínútu leiksins og Robinho bætti við öðru marki á 20. mínútu og staðan var 2-0 í hálfleik og yfirburðir Brasilíumanna miklir.

Maicon gulltryggði svo sigur Brasilíu með þriðja markinu á 62. mínútu og þar við sat.

Brasilíumenn mæta Ítölum í lokaleik riðilsins á sunnudag en Ítalir geta einnig tryggt sig inn í undanúrslitin með sigri gegn Egyptum á eftir.