Eriksson næsti landsliðsþjálfari Svía?

Sænska knattspyrnusambandið gerir lítið úr þeim fréttaflutningi að sambandið vilji fá Sven-Göran Eriksson sem næsta landsliðsþjálfara Svía.

Lars Lagerback, sem hefur stýrt liðinu í síðustu fimm undankeppnum, er á förum þar sem Svíar hafa nánast glutrað möguleikanum á að komast á HM næsta sumar.

Skoðanakannanir í Svíþjóð hafa leitt í ljós að Eriksson er fyrsti kostur sænsku þjóðarinnar í starfið.

Talsmaður sænska knattspyrnusambandsins segir að sambandið hafi ekki sett upp neinn óskalista enn sem komið er og það muni ekki vera gert fyrr en undankeppninni er lokið.

Eriksson hefur sjálfur lýst því yfir að hann vilji þjálfa sænska landsliðið áður en hann hættir að þjálfa.

Hægri hönd Eriksson, Tord Grip, segist ekki vita hvort Eriksson geti fengið sig lausan frá Notts County en efast ekki um að hann hafi áhuga á starfinu.