Munaði litlu að Óli Jó fengi leik gegn Maradona

Litlu mátti muna að Ísland hefði leikið æfingaleik gegn Argentínu ytra í síðasta mánuði en hætt var við það á síðustu stundu. Landsliðsþjálfari Argentínu er sem kunnugt er hinn goðsagnakenndi Diego Maradona.

Þetta sagði Ólafur Jóhannesson landsliðsþjálfari þegar Vísir hitti á hann á æfingu landsliðsins í Kórnum í dag.

„Við fengum fyrirspurn frá knattspyrnusambandi Argentínu um hvort við hefðum áhuga á að koma og spila við þá," sagði Ólafur. „Við sögðum já við því eins og við gerum alltaf þegar lið ákveða að bjóða okkur til sín. Í kjölfarið tóku við bréfaskriftir á milli sambandsins okkar og þeirra en þeir ákváðu svo að hætta við."

„Til stóð að þetta yrði æfingaleikur sem færi ekki fram á alþjóðlegum leikdegi og að liðið þeirra yrði aðeins skipað leikmönnum úr argentínsku deildinni. Þeim hefur gengið nokkuð illa og ætluðu að fá þarna einn leik til að byggja upp sjálfstraustið. Þá datt þeim í hug að tala við okkur," sagði Ólafur í léttum dúr.

Í gær var það svo tilkynnt að Ísland muni leika æfingaleik við Íran þann 10. nóvember í höfuðborginni Teheran. Sá leikur er ekki á alþjóðlegum leikdegi.

„Mér líst frábærlega á það. Við fáum oft á þessum árstíma boð frá hinum og þessum löndum víðs vegar um heiminn um að koma og spila og var ákveðið að taka boði Írana. Þessi ferð verður KSÍ að kostnaðarlausu og óhætt að segja að verði gaman að koma til Íran."

Ólafur segir að hann muni reyna að fá leikmenn sem spila með norskum og sænskum liðum enda ljúki tímabilinu í þeim löndum fyrir landsleikinn gegn Íran. Að auki verður liðið skipað leikmönnum sem spila hér á landi.