Vilhjálmur telur að skattlagning muni fæla frá erlenda fjárfesta

Áhrif skattlagningar á orkufrekan iðnað verða fyrst og fremst þau að fæla fjárfesta frá og byggja starfsemina upp annars staðar, sagði Vilhjálmur Egilsson, framkvæmdastjóri Samtaka atvinnulífsins á umhverfisþingi í morgun. Hann sagði að umhverfisáhrifin af skattinum væru því engin.

„Það eru alger öflugmæli að kynna þessa skattheimtu sem umhverfisgjöld," segir Vilhjálmur Egilsson. Hann segir að á næstu árum verði við það miðað að íslenskur orkufrekur iðnaður falli undir viðskiptakerfi ESB með útstreymisheimildir en muni ekki þurfa að greiða fyrir þær nema að því marki sem útstreymi sé umfram það sem gerist hjá þeim bestu í viðkomandi atvinnugrein.

Vilhjálmur sagði jafnframt að nýir samningar um orkuverð myndu allir ganga út frá því að orkuseljandinn tæki á sig skattinn. „Og þá vaknar enn ein spurninginn. Ráða íslensku orkufyrirtækin við að taka á sig rafmagnsskattinn?" Hann sagði að aðalgagnrýnin á orkufyrirtækin hafi verið sú að þau selji orkuna á of lágu verði til stórnotenda og tapi eða hagnist lítið sem ekkert á orkuframkvæmdunum. „Eina undantekningin er þegar erlendir fjárfestar vilja eignast orkufyrirtækin. Þá verða þau allt í einu helstu gróðafyrirtæki landins sem þjóðin má alls ekki missa af," segir Vilhjálmur.

Vilhjálmur sagði að þessi skattlagningaráform væru veruleg ógnun við fjárfestingar í orkuframleiðslu og orkufrekum iðnaði.