Valið á King réttlætt

Enska knattspyrnusambandið hefur réttlætt val Fabio Capello landsliðsþjálfara Englands á Ledley King, varnarmanni Tottenham.

King á við krónísk meiðsli í hné að stríða sem gerir það að verkum að hann getur ekki æft eðlilega. Harry Redknapp, stjóri Tottenham, er andvígur því að hann spili með landsliðinu.

„Það verða engar áhættur teknar varðandi hann," sagði talsmaður enska knattspyrnusambandsins. „Forráðamenn landsliðsins hafa fullan skilning á hans ástandi en þeir vilja skoða hann nánar."

King lék síðast með enska landsliðinu í júní árið 2007 en hann hefur verið í byrjunarliði Tottenham í 22 leikjum á tímabilinu og hefur þótt standa sig vel.

Hins vegar bólgnar hægra hnéð hans eftir erfiðar æfingar og leiki sem gerir það að verkum að hann getur nánast ekkert æft.

Redknapp mótmælti landsliðsvali Capello meira að segja áður en King var valinn.

„Ef hann myndi spila með enska landsliðinu á miðvikudegi gæti hann ekki spilað með okkur á laugardagi. Þetta er því fáránlegt ástand frá okkar sjónarhóli," sagði Redknapp.