Áætlun um endurreisn fjármálakerfisins kynnt

Starfsáætlun samráðsnefndar um endurreisn fjármálakerfisins verður kynnt í fyrrmálið. Formaður nefndarinnar, Svíinn Mats Josefsson, mun kynna áætlunina á fundi með blaðamönnum í Þjóðmenningarhúsinu. Hann var ráðinn til tímabundinna starfa 1. desember.

Mats Josefsson er reynslumikill bankamaður. Hann starfaði í 13 ár hjá Alþjóðagjaldeyrissjóðnum en var áður aðstoðarforstjóri sænska fjármálaeftirlitsins og þar á undan forstöðumaður í sænska seðlabankanum. Hann stýrði eftirliti með bankastarfsemi í Svíþjóð á árunum 1990 til 1994 á tímum bankakreppunnar þar. Josefsson lék sömuleiðis stórt hlutverk í milligöngu AGS í uppbyggingu bæði í Tyrklandi og Tælandi eftir bankakreppu sem þau lönd glímdu við frá því um og eftir aldamótin.