Jóhanna var fyrst orðuð við forsætisráðuneytið í dag

Jóhanna Sigurðardóttir sagði í samtali við fréttamenn í dag að það hefði fyrst verið orðað við sig í morgun að hún yrði forsætisráðherra. Hins vegar voru hugmyndir uppi um það á meðal forystumanna Samfylkingarinnar og Sjálfstæðisflokksins í gær að bæði Ingibjörg Sólrún Gísladóttir og Geir Haarde vikju úr embættum sínum og nýir aðilar tækju við, eftir því sem fram komu í samtali Þorgerðar Katrínar Gunnarsdóttur við fréttamann RÚV í kvöld. Sjálfstæðismenn hafi viljað að Þorgerður Katrín myndi leiða ríkisstjórnina. Samfylkingarmenn hafi viljað utanaðkomandi mann. Þorgerður sagðist telja að hugmyndin að Jóhönnu Sigurðardóttur sem forsætisráðherra hefði komið upp á þingflokksfundinum í morgun.