Engin óþarfa áhætta tekin með Torres

Vicente Del Bosque, landsliðsþjálfari Spánverja, hefur tjáð Rafa Benitez, knattspyrnustjóra Liverpool, að hann muni ekki taka neina óþarfa áhættu með Fernando Torres er Spánn mætir Bosníu í undankeppni HM á miðvikudag.

Torres lék í 53 mínútur í 2-1 sigri Spánverja á Armenum en er meiddur. Það er alls óvíst hvort hann geti leikið á miðvikudag og Del Bosque hefur lofað að nota hann ekki nema hann sé í standi.

Spánverjar hafa þegar tryggt sér farseðilinn á HM og leikurinn gegn Bosníu skiptir þá í raun engu máli.

Torres verður engu að síður áfram í herbúðum Spánverja þar sem hann mun fá bestu meðhöndlun að sögn Del Bosque.