Moyes hlær að Fergie og Benitez

David Moyes, stjóri Everton, segist hafa hlegið er hann fylgdist með deilum Sir Alex Ferguson og Rafa Benitez um hvor þeirra væri meiri eyðslukló.

„Ég hló bara þegar ég sá þetta. Þeir að rífast um hvor eyðir meiru. Þegar við mætum þessum liðum er ekkert rætt um peninga. Þegar það er stigið yfir hvítu línuna er það bara 11 á móti 11 og menn halda áfram," sagði Moyes sem hefur gert frábæra hluti með Everton og það án þess að hafa getað eytt mikið af peningum.

„Okkur hefur gengið mjög vel í ár gegn liðunum fyrir ofan okkur og ég hrósa leikmönnum mínum og þeirra viðhorfi. Andinn er mjög góður. Stuðningsmenn okkar eru engir hálfvitar og hugsa ekki um hvort liðið hefur eytt meiri peningum þegar lið mætast. Eina sem skiptir máli eru úrslitin, ekki peningarnir," sagði Moyes.

„Okkur hefur bara gengið vel að ná árangri þrátt fyrir takmörkuð fjárráð."