Hiddink óttast Shearer-áhrifin á móti Newcastle

Guus Hiddink, stjóri Chelsea, er vel meðvitaður um það gæti verið erfitt að eiga við Newcastle í fyrsta leiknum undir stjórn Alan Shearer enda ætli leikmenn liðsins að sanna sig fyrir nýjum stjóra. Liðin mætast á St James Park á morgun.

„Það vita allir hver staðan er. Það má búast við sterkum viðbrögðum hjá Newcastle, bæði hjá leikmönnum og áhorfendum. Við vitum að þetta verður erfiður leikur á móti baráttuglöðu liði," sagði Hiddink sem hefur séð tímana tvenna í boltanum.

Newcastle hefur spilað skelfilega að undanförnu. Liðið hefur aðeins náð í tvö stig út úr síðustu fimm leikjum sínum og ennfremur aðeins unnið einn leik frá jólum.

„Það mun gefa leikmönnum Newcastle auka orku að fá nýja rödd inn í búningsklefann og við þurfum bara að mæta því inn á vellinum," sagði Hiddink en fyrri leik liðanna í vetur lauk með markalausu jafntefli á Brúnni.

Hiddink ætlar að spara Didier Drogba í leiknum á morgun þar sem að hann vill hafa hann heilan fyrir Meistaradeildarleikinn á móti Liverpool í næstu viku.

Hiddink sagði að Drogba væri meiddur á ökkla en eins er hann eflaust ennþá að jafna sig andlega eftir harmleikinn þegar 19 manns dóu á meðan leik Fílbeinsstrandarinnar og Malaví stóð í undankeppni HM. Drogba skoraði tvö mörk í 5-0 sigri en troðningurinn á vellinum breytti góðum sigri í mikinn harmleik.

Hiddink er ekkert búinn að gefa meistaratitilinn frá sér. „Á meðan að við eigum möguleika þá berjumst við áfram. Við stefnum ennþá á það að verða meistarar," sagði Hiddink.