Nýstárlegar kennsluaðferðir: Nýr framhaldsskóli settur á morgun

„Það er mjög spennandi að byrja svona með nýjan skóla," segir Guðbjörg Aðalbergsdóttir, skólameistari Framhaldsskólans í Mosfellsbæ. Skólinn verður settur í fyrsta skipti á morgun klukkan 13:30 í húsnæði skólans að Brúarlandi.

Í skólanum eru um 70 nemendur og rúmlega tíu starfsmenn. Skólinn er ríkisskóli, sem rekinn er á sambærilegan hátt við langflesta framhaldsskóla á landinu. Að sögn Guðbjargar hefur hann þó ýmsa sérstöðu.

Skólinn kennir sig við auðlindir og umhverfi í víðum skilningu og eru þær áherslur samfléttaðir við skólastarfið. Er þar vísað til þeirra auðlinda sem felast í mannauði og menningu ekki síður en náttúruauðlinda.

Helsta sérstaða skólans er þó að sögn Guðbjargar kennsluaðferðirnar.

„Fyrir þann sem kæmi hér inn og sæi allt sem er í gangi, þá væri það mesta nýjungin. Við ætlum ekki að nota mikið af hefðbundnum kennsluaðferðum á borð við fyrirlestra, heldur munu nemendur læra í gegnum verkefnin sem þeir vinna."

Þá er stundatafla nemendanna sveigjanleg, en einum af hverjum fjórum tímum geta þeir valið hvernig þeir verja; hvort þeir mæti í stærðfræðitíma, íslensku eða önnur fög.

„Meginmarkmiðið með þessu er að ala þau upp í að vera sjálfstæð og taka ábyrgð á sínu."

Þá er það einnig markmið skólans að byggja upp öflugt félagslíf nemenda.

Að sögn Guðbjargar er fyrirséð að skólinn stækki á næstunni. Hann muni hýsa um 400 til 500 nemendur innan nokkurra ára og flytji þá í nýtt og stærra húsnæði sem verður byggt undir skólann.