Gunnleifur: Fyrri hálfleikurinn vonbrigði

Gunnleifur Gunnleifsson stóð í marki íslenska landsliðsins í kvöld og átti prýðisgóðan leik, en hann bjargaði í nokkur skipti með góðum markvörslum. Hann var þó ekki nógu ánægður með úrslitin.

"Við ætluðum að reyna að vinna leikinn og halda hreinu. Fyrri hálfleikurinn var hálfgerð vonbrigði og við vorum hálf andlausir og áhugalausir. Svo fannst mér allt annað að sjá til okkar í síðari hálfleik þar sem við vorum betri aðilinn og sköpuðum okkur færi," sagði Gunnleifur í samtali við Vísi eftir leik.

"Við erum búnir að fá á okkur mark snemma í síðustu leikjum. Við lögðum upp með að halda hreinu út fyrri hálfleikinn, koma síðan framar á völlinn og vinna leikinn þannig. Síðan var skorað eftir rúman hálftíma og alltaf svekkjandi að fá á sig mark. Hann hitti boltann vel og setti hann alveg út í hornið, en samt alltaf svekkjandi þegar er skorað hjá manni," bætti Gunnleifur við.

Eins og áður segir átti Gunnleifur góðan leik í kvöld og virðist vera í góðu formi.

"Ég var í góðum gír og fékk auðvitað hjálp frá félögunum við að verja markið. Þetta eru allt topp fótboltamenn sem eru með mér í þessu og það kemur maður í manns stað og því ekkert vandamál þó einhverja hafi vantað í vörnina. Brynjar Björn var mjög flottur í leiknum, bæði í fyrri hálfleik og svo var þetta ekkert mál fyrir hann í vörninni í seinni hálfleik. Hann kann þetta og stjórnaði þessu alveg," sagði Gunnleifur að lokum.