Fer frá Boro ef liðið fellur

Austurríkismaðurinn Emanuel Pogatetz, fyrirliði Middlesbrough, segir að hann ætli sér að fara frá liðinu ef það fellur úr ensku úrvalsdeildinni í vor.

Boro er sem stendur fjórum stigum frá öruggu sæti í deildinni en átta umferðir eru eftir af tímabilinu.

„Ég er 26 ára gamall og vil halda áfram að spila í hæsta gæðaflokki," sagði Pogatetz í samtali við enska fjölmiðla. „Ef ég fer í sumar væri það til að fara til liðs sem spilar í Evrópukeppninni eða er með háleit markmið."

„Það er mjög þreytandi að vera í fallbaráttu öll tímabil," bætti hann við.

Pogatetz kom til Boro frá Bayer Leverkusen árið 2005 og hefur verið meðal lykilleikmanna liðsins síðan.