Arbeloa nálgast Real Madrid að eigin sögn

Spánverjinn Alvaro Arbeloa hjá Liverpool hefur staðfest í viðtölum við spænska fjölmiðla að hann sé nálægt því að ganga loksins í raðir Real Madrid en hann hefur verið sterklega orðaður við 4,5 milljón punda félagsskipti þangað í sumar, sérstaklega eftir komu Glen Johnson til Liverpool.

„Eins og staðan er núna þá er ég leikmaður Liverpool og einbeiti mér að því en ég get alveg upplýst að það er ekki langt í að gengið verði frá félagsskiptum mínum yfir í Real Madrid. Ég er sannfærður um að á næstu dögum muni félögin ná samkomulagi sem henti öllum aðilum," er haft eftir Arbeloa í viðtali við Marca.