Umfjöllun: Hólmar Örn afgreiddi meistarana

Hólmar Örn Rúnarsson tryggði Keflavík öll stigin á móti FH í stórleik fyrstu umferðar Pepsi-deildar karla. Keflavík vinnur því ríkjandi Íslandsmeistara annað árið í röð í fyrsta leik á heimavelli.

Leikurinn fór fram við afar erfiðar aðstæður á Sparisjóðsvellinum í Keflavík. Hávaðarok, rigning og þungur völlur. Leikmönnum ber þó að hrósa fyrir ágætis knattspyrnu miðað við aðstæður.

Vendipunktur leiksins varð á 20. mínútu er Davíð Þór Viðarsson togaði Hauk Inga Guðnason niður og var vikið af velli með rautt spjald. 70 mínútur eftir og erfitt verkefni beið FH-inga á erfiðum velli.

Þeir héldu þó út fyrri hálfleikinn og fengu ekki á sig nein hættuleg færi. Næst komst Keflavík að skora úr aukaspyrnunni sem þeir fengu er Davíð var sendur í bað. Haukur tók hana, setti boltann upp í markhornið en Daði Lárusson varði glæsilega en hann átti mjög góðan leik í kvöld.

FH-ingar fengu líklega besta færi hálfleiksins er besti útileikmaður liðsins, Atli Guðnason, náði flottu skoti í teignum sem Lasse Jörgensen mátti hafa sig allan við að verja.

Síðari hálfleikur fór hægt af stað. Keflvíkingar merkilega rólegir í tíðinni og tíu leikmenn FH stýrðu leiknum. Það kom því nánast eins og þruma úr heiðskíru lofti er Hólmar kom þeim yfir.

Simun hafði skeiðað upp völlinn, lagði boltann í teiginn. Pétur Viðarsson hreinsaði en boltinn fór á Hólmar sem afgreiddi knöttinn snyrtilega í netið.

FH-ingar börðust hetjulega, gerðu hvað þeir gátu en sóknarleikur þeirra var bitlaus og ómarkviss. Þeir fóru illa með fín aukaspyrnufæri og skutu í þrígang hátt yfir markið.

Í tvígang gleymdu þeir sér í vörninni, Keflvíkingar fengu dauðafæri en Daði varði vel í bæði skiptin. Þess utan gekk Keflavík bölvanlega að skapa sér færi í leiknum.

Það voru samt þeir sem fögnuðu innilega í lokin. Búið að moka yfir Grýlu síðasta sumars að þeirra mati og augljóslega þungu fargi létt af leikmönnum sem og þjálfara liðsins.

Keflavík-FH 1-0

1-0 Hólmar Örn Rúnarsson (54.)

Keflavíkurvöllur. Áhorfendur: 1.272

Dómari: Kristinn Jakobsson (7)

Skot (á mark): 8-13 (5-4)

Varin skot: Lasse 4 - Daði 4

Horn: 6-5

Aukaspyrnur fengnar: 19-16

Rangstöður: 8-3

Keflavík (4-4-2)

Lasse Jörgensen 7

Guðjón Árni Antoníusson 6

Bjarni Hólm Aðalsteinsson 6

Alen Sutej 7

Brynjar Guðmundsson 6

Símun Samuelsen 5

Hólmar Örn Rúnarsson 7

Jón Gunnar Eysteinsson 5

Jóhann B. Guðmundsson 5

Magnús Sverrir Þorsteinsson 6

(90., Einar Einarsson -)

Haukur Ingi Guðnason 6

(67., Hörður Sveinsson 5)

FH (4-3-3)

Daði Lárusson 8 - Maður leiksins

Guðmundur Sævarsson 6

Pétur Viðarsson 7

Ásgeir Gunnar Ásgeirsson 6

Hjörtur Logi Valgarðsson 5

Davíð Þór Viðarsson 4

Matthías Vilhjálmsson 6

Tryggvi Guðmundsson 6

(78., Björn Sverrisson -)

Matthías Guðmundsson 4

(57., Alexander Söderlund 4)

Atli Guðnason 7

Atli Viðar Björnsson 4

(78., Hákon Hallfreðsson -)