Capello: Ég er stoltur af liði mínu

Landsliðsþjálfarinn Fabio Capello var ekki sáttur með frammistöðu dómarans Damir Skomina í 1-0 tapi Englands gegn Úkraínu í undankeppni HM 2010.

Skomina gaf markverðinum Robert Green rautt spjald þegar tæpur stundarfjórðungur var liðinn af leiknum fyrir að brjóta á Artem Milevskiy en í fyrstu ætlaði hann að gefa varnarmanninum Rio Ferdinand rauða spjaldið.

„Ég skil ekki hvernig dómarinn gat gert þessi mistök þar sem Rio var á hlaupum en Green var að fleygja sér á boltann en tók leikmanninn. Vanalega tala ég ekki um frammistöðu dómara í leikslok en ég get ekki með nokkru móti skilið hvernig hann gat ruglast á þessu," sagði Capello í leikslok en þetta var fyrsta tap Englendinga undir hans stjórn í undankeppninni.

Capello hrósaði leikmönnum sínum fyrir að berjast áfram manni færri.

„Ég er stoltur af liði mínu. Mér fannst við spila mjög vel í seinni hálfleiknum og náðum að skapa okkur mikið af marktækifærum þrátt fyrir að vera manni færri," sagði Capello.