Flóttamaður óttast um líf sitt

Wali Safi, flóttamaður frá Afganistan, sendi fjölmiðlum tilkynningu í dag með þeim skilaboðum að hann væri farinn í felur til að forðast það að honum yrði vísað úr landi. Hann segir að á miðvikudag hafi þrír vinir sínir verið handteknir og þeim verið vísað til Grikklands daginn eftir. „Ef ég hefði ekki farið í felur hefði mér einnig verið vísað úr landi," segir Safi. Hann segist óttast um líf sitt og hann forðist tilhugsunina við að það að vera handtekinn og aðskilinn frá unnustu sinni, stjúpbörnum og öðrum sem honum þyki vænt um.

Wali Safi segir að sér líði vel miðað við aðstæður og þrátt fyrir að hann upplifi mikla streitu og kvíða sé það mun betra en að láta lífið eða að rotna í grískum útrýmingarbúðum. Hann hvetur ráðuneyti mannréttindamála til að endurskoða mál sitt. Þar til það gerist verði hann áfram í felum.

Úlfhildur Ólafsdóttir, talskona Wali Safi segir að verið sé að vinna í því að skrifa dómsmálaráðherra bréf þar sem farið verði fram á það að ákvörðun ráðherra vegna mannanna verði endurskoðuð þannig að þeir geti dvalið hér. „Auðvitað erum við öll að reyna að fá þessa menn til baka sem voru sendir en við erum kannski að vinna í þessu máli hans Wali af því að hann er ennþá hérna," segir Úlfhildur í samtali við Vísi.