Verðum frægari en Bítlarnir

Alvaro Arbeloa, leikmaður Liverpool, telur að leikmenn félagsins verði frægari en sjálfir Bítlarnir ef liðinu tekst bæði að verða Englands- og Evrópumeistarar í vor.

Liverpool er sem stendur einu stigi á eftir toppliði Manchester United í ensku úrvalsdeildinni og er komið í fjórðungsúrslit Meistaradeildar Evrópu þar sem liðið mætir Chelsea.

„Liðið er á góðri leið með að verða frægari en Bítlarnir," er haft eftir Arbeloa í enska götublaðinu The Sun. „Það eru margar vikur enn eftir og þær gætu orðið mjög tilfinningaþrungnar. En þetta gæti orðið sögulegt tímabil hjá okkur."

„Pressan er öll á Manchester United. Ég hef trú á að liðinu mistakist og þá verðum við tilbúnir."

„Okkar markmið er að vinna alla okkar deildarleiki sem við eigum eftir. Það verður erfitt en ekki ómögulegt. Sigurinn á Manchester United á Old Trafford gerði okkur enn hungraðri í titilinn."