Beckham ver Rooney

David Beckham hefur tekið upp hanskann fyrir Wayne Rooney og segir það hreinlega hættulegt að reyna að breyta honum of mikið.

Landsliðsþjálfarinn Fabio Capello skammaði Rooney í morgun og sagði að hann væri brjálaður. Var Capello að vitna til þess er Rooney sló í hornfánann er honum var vikið af velli gegn Fulham.

„Wayne væri ekki sá frábæri leikmaður sem hann er án þessa skaps og viðhorfs. Að taka slíkt frá leikmanni er hættulegt því hann breytist," sagði Beckham en þeir félagar eru saman með enska landsliðinu þessa dagana.

„Ég hef ekki trú á því að nokkur þjálfari reyni að breyta Wayne of mikið og Capello er þar á meðal. Wayne er ástríðufullur leikmaður sem vill vinna. Þegar hlutirnir ganga ekki upp verður hann svekktur. Stundum ganga menn of langt. Ég hef lent í því sjálfur. Ég hef samt engar áhyggjur af Wayne því hann er með fullt af góðu fólki sem verndar hann," sagði Beckham.