Drogba tilbúinn í samningaviðræður

Umboðsmaður Didier Drogba segir að leikmaðurinn sé til í að skoða nýtt samningstilboð ef forráðamenn Chelsea vilja halda honum hjá félaginu.

Drogba á rúmt ár eftir af samningi sínum við Chelsea og var talið fullvíst nú fyrr á tímabilinu að hann myndi yfirgefa félagið nú í sumar.

En eftir að Guus Hiddink tók við stjórn liðsins af Luiz Felipe Scolari hefur Didier Drogba fundið fjölina sína á nýjan leik og hefur átt góðu gengi að fagna.

„Hann er ánægður," sagði Thierno Seydi, umboðsmaður Drogba. „Hann hefur verið að spila vel og skora mörg sem segir manni að hann sé ánægður."

„Ef Chelsea vill gera honum nýtt tilboð munum við skoða það og taka svo ákvörðun um framtíð hans."

„Það eru mörg félög víða um Evrópu sem hafa sýnt honum áhuga en við ætlum að bíða með allar ákvarðanir þar til eftir að tímabilinu er lokið."