Robinho fer ekki í sumar

Mark Hughes, knattspyrnustjóri Manchester City, neitar því að Robinho sé á leið frá félaginu nú í sumar.

Hann hefur verið sagður á leið frá félaginu í enskum fjölmiðlum en Hughes hafnar því.

„Hann er í mínum framtíðaráætlunum," sagði hann. „Þeir sem halda öðru fram eru að reyna að valda okkur skaða. Robinho er frábær leikmaður sem vill vera hluti af því sem við erum að gera. En hann er líka fagmaður og hefur ekki gaman af því að tapa."

Robinho hefur lent í ýmsu á sínu fyrsta tímabili í ensku úrvalsdeildinni. Í janúar var hann sektaður fyrir að yfirgefa æfingabúðir félagsins og halda til síns heima í leyfisleysi.