Grobbelaar: Það styttist í að Reina skori fyrir Liverpool

Bruce Grobbelaar, fyrrum markvörður Liverpool hefur trú á því að það styttist í að spænski markvörður liðsins Jose „Pepe" Reina skori fyrir félagið.

Reina hefur góðan spyrnufót sem hann hefur sannað í síðustu tveimur leikjum liðsins því í þeim báðum hefur hann lagt upp mark með löngum sendingum fram.

Reina lagði upp mark fyrir Andrea Dossena í 4-1 sigri á Manchester United og endurtók leikinn síðan í 5-0 sigri á Aston Villa um síðustu helgi þegar hann lagði upp mark fyrir Albert Riera.

„Það getur alveg gerst að hann skori sjálfur einn daginn. Það getur vel skapast þær aðstæður þegar hann er kominn 30 til 35 metra inn á völlinn því hann getur sparkað svo langt og svo nákvæmt," sagði Bruce Grobbelaar.

José „Pepe" Reina hefur staðið sig frábærlega með Liverpool-liðinu en hann hélt hreinu í 100. sinn í sigrinum á Aston Villa um síðustu helgi.