Benitez: Gerrard á að vera valinn bestur

Rafa Benitez, knattspyrnustjóri Liverpool, segir að fyrirliði sinn, Steven Gerrard, eigi skilið að vera valinn knattspyrnumaður ársins í ensku úrvalsdeildinni.

Fastlega er búist við því að slagurinn muni standa á milli Gerrard, Nemanja Vidic og Ryan Giggs. Allir hafa verið frábærir í vetur.

„Ég myndi kjósa Stevie. Ef hann getur haldið áfram að spila svona þá er það ekki spurning. Ég lít svo á að Stevie sé einn besti leikmaður heims. Það er erfitt að segja að einn leikmaður sé betri en annar þegar talað er um marga hæfileikamenn en hann er klárlega einn af þeim bestu," sagði Benitez.

„Hann hefur þroskast mikið og er enn að læra. Ég tel hann geta orðið enn betri en hann er í dag. Hann hefur allt sem til þarf og leggur mikið á sig til þess að bæta sig. Það er afar jákvætt. Maður veit að þegar hann er á vellinum eru sigurmöguleikarnir meiri en ella."

Gerrard er búinn að skora 21 mark á leiktíðinni og stefnir hraðbyri á að bæta markamet sitt sem er 23 mörk leiktíðina 2005-06. Hann hefur skorað yfir 20 mörk í þremur af síðustu fjórum leiktíðum.