Bjarni: Sækjum ekki gull í greipar FH þetta árið

Bjarni Jóhannsson þjálfari Stjörnunnar var eðlilega vonsvikinn með 1-4 tap sinna manna gegn FH í Pepsi-deildinni í kvöld en hrósaði þó sínum mönnum fyrir að gefast aldrei upp í leiknum.

„Við sækjum ekki gull í greipar FH þetta árið alla vega en mér fannst við koma ágætlega stemdir í leikinn. Þeir nýttu eiginlega sitt fyrsta færi og það er vissulega kenniteikn um meistaralið og mér fannst markið slá okkur aðeins út af laginu miðað við hvernig leikurinn var búinn að spilast.

Við misstum aðeins trúna í nokkrar mínútur en mér fannst við samt aldrei gefast upp eða leggjast í kör eins og sagt er og ég hrósa mínum mönnum fyrir það.

Leikurinn var því ekkert svo ójafn fannst mér en eins og ég segi þá kunna þeir að nýta sín færi og gerðu það," segir Bjarni.

Stjörnumenn höfðu ekki tapað á Stjörnuvellinum í deildarkeppni í rúmt ár og því má segja að það hlyti að koma að því á endanum.

„Það er alltaf meiri líkur á sigri á heimavelli og það er engin ný fræði að liðum gangi betur þar heldur en á útivelli. Við þurfum bara að halda áfram að berjast og nú þurfum við bara að taka okkur tak fyrir næsta leik," segir Bjarni.