HM-vonir Norðmanna nánast úr sögunni

Noregur á nánast engan möguleika á að komast í umspil í undankeppni HM 2010 í Evrópu þrátt fyrir að hafa lent í öðru sæti í sínum riðli.

Í dag fer fram lokaumferð riðlakeppniinnar í öllum riðlunum nema 9. riðli.

Noregur varð í öðru sæti riðilsins með aðeins tíu stig. Ísland varð í neðsta sæti riðilsins með fimm stig.

Af þeim níu liðum sem verða í öðru sæti riðlanna komast átta í umspil. Þó lokaumferðin sé eftir í hinum riðlunum átta er ljóst að árangur Noregs muni líklega ekki duga liðinu til að komast áfram í umspilið.

Norðmenn þurfa að treysta á að Portúgal tapi fyrir Möltu með minnst þriggja marka mun og að úrslit í öðrum leikjum 1. riðils verði liðinu hagstæð. Svíar mega til að mynda ekki vinna Albaníu í sínum leik.

Nú þegar hafa fjögur lið tryggt sér sæti í umspilinu - Rússland, Bosnía, Frakkland og Írland. Fjögur til viðbótar bætast því við í kvöld.

Liðum verður raða í tvo styrkleikaflokka í umspilinu samkvæmt heimslista Alþjóða knattspyrnusambandsins.

Miðað við stöðu liðanna í riðlunum í dag og núverandi heimslista myndu flokkarnir vera þannig skipaðir:

Efri styrkleikaflokkur:

Rússland (6. sæti)

Frakkland (10. sæti)

Grikkland (12. sæti)

Portúgal (17. sæti)

Neðri styrkleikaflokkur:

Úkraína (25. sæti)

Írland (38. sæti)

Bosnía (46. sæti)

Slóvenía (54. sæti)