Micah Richards er sár

Micah Richards hefur viðurkennt að hann sé sár yfir þeirri staðreynd að hann hafi ekki verið valinn í enska landsliðshópinn.

Framundan eru leikir gegn Slóvakíu og Úkraínu hjá enska landsliðinu en svo virðist sem að Richards sé ekki í framtíðarplönum Fabio Capello landsliðsþjálfara.

Síðast spilaði Richards með enska landsliðinu í nóvember 2007 er England tapaði fyrir Króatíu í frægum leik og varð um leið af sæti á EM 2008.

Hann hefur hins vegar verið valinn í U-21 landsleikina gegn Noregi og Frakklandi og vonar að Capello sjái hann spila þar.

„Ég spilaði ellefu leiki með landsliðinu á sínum tíma og fannst að ég hafi staðið mig vel," sagði Richards í samtali við enska fjölmiðla. „Ég varð svo óheppinn og meiddist á slæmum tíma þegar að Wes Brown og Glen Johnson komu báðir í landsliðið. Þeir hafa staðið sig vel og því hefur það reynst mér erfitt að komast aftur í liðið."

„En ég hef öðlast sjálfstraustið á nýjan leik. Ég nýt þess að spila fótbolta og finnst að ég sé að banka á landsliðsdyrnar."