Wolves reynir að fá Mancienne frá Chelsea

Stjórnarformaðurinn Jez Moxey hjá nýliðum Wolves segir líklegt að félagið reyni að fá varnarmanninn Michael Mancienne aftur að láni frá Chelsea en leikmaðurinn lék í þrjá mánuði með Úlfunum á síðustu leiktíð í b-deildinni á Englandi.

U-21 árs landsliðsmaðurinn þótti reyndar standa sig það vel á meðan hann var á láni hjá Wolves að Fabio Capello, landsliðsþjálfari Englendinga, kallaði hann upp í a-landsiðshópinn fyrir vináttulandsleik gegn Þýskalandi.

Mancienne fékk einhver tækifæri með Chelsea þegar hann sneri aftur úr láninu en náði ekki að festa sig í sessi og nýji knattspyrnustjórinn á Brúnni Carlo Ancelotti er ekki sagður mótfallinn því að senda leikmanninn í árs lán.

Talið er að Wolves hafi þegar boðið 4 milljónir punda í leikmanninn en Chelsea hafi hafnað boðinu.

„Ég held að Chelsea vilji ekki selja leikmanninn á þessum tímapunkti en lánssamningur gæti komið til greina," segir Moxey í samtali við Sky Sports fréttastofuna.