Launavísitala hækkar lítillega

Launavísitala hækkaði um 0,4 prósent frá júní til júlí samkvæmt Hagstofu Íslands. Síðastliðna tólf mánuði hefur launavísitalan hækkað um 2,6 prósent.

Kaupmáttur launa jókst um 0,2 prósent milli mánaða. Síðustu tólf mánuði hefur vísitala kaupmáttar launa hins vegar lækkað um 7,8 prósent. Launahækkanir félaga í Alþýðusambandi Íslands, sem áttu að taka gildi í mars, tóku ekki gildi fyrr en í júlí og skýrir það hækkunina.

Þá hækkuðu almennir launataxtar um 6.750 til 8.750 krónur. Seinni hluti þeirra hækkana kemur til framkvæmda 1. nóvember.- kóp