Það á enginn öruggt sæti í liði Juventus

Hinn nýi þjálfari Juventus, Ciro Ferrara, segir að hvorki Alessandro Del Piero eða nokkur annar leikmaður félagsins eigi öruggt sæti í byrjunarliðinu í vetur.

Del Piero hefur ekkert spilað það sem af er tímabili en Ferrara hefur viljað hvíla hann þar sem hann er að jafna sig eftir meiðsli. Del Piero var klár í slaginn um helgina en Ferrara hvíldi hann samt.

Það var ekki vinsælt hjá hinum 34 ára gamla leikmanni.

„Alex er fyrirliðinn, tákn félagsins og er kannski ekki ánægður með þessa ákvörðun mína. Hann verður samt að átta sig á því að við höfum fjóra frambærilega framherja og enginn þeirra á öruggt sæti í liðinu," sagði Ferrara.