Fékk svar frá forsætisráðherra Dana

„Mér finnst gott að hann svari,“ segir Grímur Atlason, sveitarstjóri í Dalabyggð. Hann fékk í fyrradag svar við tölvupósti sem hann sendi Lars Lökke Rasmussen, forsætisráðherra Danmerkur. Þar gerði hann athugasemdir við yfirlýsingar ráðherrans vegna frétta um meðferð Dana á 22 grænlenskum börnum, sem voru tekin af foreldrum sínum og flutt til Danmerkur á sjötta áratugnum.

Í tölvupóstinum skammar Grímur forsætisráðherrann fyrir yfirlýsingar í framhaldi af fréttum um málið. Ráðherrann sagði að þetta væri hluti af liðinni tíð; fortíðinni væri ekki hægt að breyta og að þeim sem tóku börnin af foreldrum sínum hefði gengið gott eitt til.

Í bréfi Gríms sagði hann forsætisráðherrann tala eins og hægriöfgamaður. Málflutningur hans væri málflutningur nýlenduherra. Danmörk skuldaði grænlensku þjóðinni afsökunarbeiðni og fjölskyldum barnanna skaðabætur.

Grímur segir það hneyksli að meðferðin á grænlensku börnunum hafi hvorki fengið næga athygli hjá Dönum né hér á landi. „Það er dálítið síðan ég skrifaði þetta bréf og átti ekki von á að fá þetta svar,“ segir Grímur.

En í fyrradag barst honum vestur í Dali tölvupóstur frá danska forsætisráðuneytinu með viðhengdu bréfi frá ráðherranum sjálfum. Lars Lökke segist hafa fengið bréf Gríms og vísar í efni þess en áréttar svo það sem varð Grími tilefni skrifanna án þess að lofa neinni afsökunarbeiðni eða skaðabótum. Danski forsætisráðherra klykkir út með að fullvissa Grím um allt sé á réttri leið í átt að sjálfbærara og sjálfstæðara samfélagi á Grænlandi og að aðferðir nýlenduveldanna séu víðs fjarri við stjórn mála í Grænlandi.