Vikuleiga fyrir hálfa milljón

Þótt Ísland sé víða kynnt sem ódýrt ferðamannaland í efnahagskreppunni kostar það sitt. Til dæmis duga ráðstöfunartekjur venjulegra heimila í heilan mánuð varla til að leigja eins og einn skóda í viku til að fara hringinn. Vilji menn spreða, má leigja sér vikuafnot af Land Rover fyrir röska hálfa milljón.

Júlí er runninn upp og landinn byrjaður að rogast með grill og útilegubúnað um landið til að skoða og njóta fósturjarðarinnar - enda heldur færri sem eiga þess kost að fljúga til útlanda í sumarfríinu nú en liðin ár. Ísland hefur í erlendum fjölmiðlum eftir bankahrunið verið mært sem ódýr áfangastaður og auglýsingar munu jafnvel hafa gengið út á að lokka menn til landsins - ekki bara til að horfa heitt vatn sprautast úr holu eða njóta kyrrðar og óbyggða - heldur vegna hruns krónunnar.

En er Ísland svo ódýrt? Ýmislegt hefur hækkað svo á milli ára - í okkar íslensku krónum - að óvíst er að ferðamenn fagni mjög þegar til landsins er komið. Fréttastofa skoðaði í dag hvað vikuleiga á nokkrum bílum hjá tveimur þekktum bílaleigum kostaði.

Hjá Avis er til dæmis hægt að leigja smábíl á um 117 þúsund krónur vikuna - hjá Hertz er ódýrasti bíllinn tæpar 160 þúsund krónur. Fjölskylduskutbíll hjá

Avis er á um 180 þúsund krónur - en Hertz rukkar samkvæmt heimasíðunni rösklega 260 þúsund fyrir skoda octavia sem hefur hingað til ekki talist til lúxusbifreiða - en vikuleigan á honum kostar meira en um helmingur heimila í landinu hefur í ráðstöfunartekjur fyrir heilan mánuð. Margir vilja gera vel við sig í fríinu og séu þeir til í að splæsa má leigja í viku Land Rover Defender - sem ýmsa ku dreyma um að fá að taka í -fyrir tæp 380 þúsund hjá Avis en um 530 þúsund hjá Hertz.