Benitez: Vildi fá fleiri mörk

Rafa Benitez, stjóri Liverpool, var gráðugur eftir stórsigur sinna manna á Aston Villa og kvartaði yfir því að sínir menn hefðu ekki skorað nóg. Leikurinn fór 5-0 fyrir Liverpool.

„Eftir að við komumst í 5-0 fengum við færi til þess að skora meira. Við hefðum átt að gera það. Við verðum að passa upp á að markamunurinn sé okkur í hag, sérstaklega þegar við erum að spila manni fleiri," sagði Benitez.

„Ekki misskilja mig. Ég var vissulega ánægður með þessa frammistöðu en mér fannst við hafa átt að skora meira," sagði Benitez en Liverpool er nú aðeins einu stigi á eftir toppliði Man. Utd.

„Hvað varðar toppbaráttuna þá verðum við bara að halda áfram að klára okkar vinnu. Við megum ekki velta okkur of mikið upp úr því hvað Man. Utd sé að gera. Ef United gerir mistök þá verðum við að nýta okkur það. Það eru átta leikir eftir og við verðum að vinna þá alla. Verðum að líta á alla leiki sem bikarúrslitaleiki."