Liverpool var eitt á toppnum í 33 ár

Manchester United hefur nú jafnað Liverpool eftir að hafa landað átjánda meistaratitlinum í sögu félagsins. Liverpool hafði eitt og sér verið sigursælasta félagið í sögu enska boltans frá því árið 1976.

Það var Arsenal sem á undan Liverpool gat státað af því að vera sigursælasta liðið í ensku knattspyrnunni, en árið 1973 jafnaði Liverpool árangur Arsenal með því að vinna sinn áttunda meistaratitil.

Árið 1976 vann Liverpool sinn níunda titil og hefur síðan verið sigursælasta liðið á Englandi þangaði til United jafnaði árangurinn á dögunum.

Það er til marks um yfirburði Manchester United á síðari árum að þegar úrvalsdeildin var stofnuð leiktíðina 1992-93 var United aðeins búið að vinna sjö meistaratitla og var því fyrir aftan Arsenal á listanum yfir flesta meistaratitla.

Þá hefðu líklega fáir þorað að vona að United ætti eftir að vinna ellefu titla á sautján árum og komast upp að hlið Liverpool.