Ferguson: Góð frammistaða

Sir Alex Ferguson var ánægður með frammistöðu sinna manna í markalausa jafnteflinu gegn Inter í kvöld. Manchester United fékk fjölda færa í leiknum, þá sérstaklega í fyrri hálfleik.

„Við lékum virkilega vel. Í 10-15 mínútna kafla í seinni hálfleik þá pressuðu þeir nokkuð mikið eins og við bjuggumst við en fyrir utan það vorum við mun betra liðið," sagði Ferguson.

„Við erum að leika mjög vel um þessar mundir, það er sama á móti hverjum við spilum. Við sýndum mikinn karakter í kvöld. Ég vona bara að okkur verði ekki refsað fyrir að hafa ekki skorað í þessum leik. Það verður mögnuð stemning í seinni leiknum á Old Trafford og ég held að við eigum góða möguleika."