Félagaskipti Sneijder staðfest

Bæði Real Madrid og Inter á Ítalíu hafa staðfest að síðarnefnda félagið hefur fest kaup á Hollendingnum Wesley Sneijder frá Real.

Sneijder gekkst undir læknisskoðun í morgun og skrifaði svo undir fjögurra ára samning sem gildir til loka leiktíðarinnar 2013.

Jose Mourinho hefur reynt að fá Sneijder undanfarnar vikur og gekk það loksins eftir í dag. Ekki er ólíklegt að hann verði í leikmannahópi liðsins sem mætir AC Milan á morgun.

Kaupverðið er óuppgefið en fjölmiðlar ytra telja líklegt að Inter hafi greitt um fimmtán milljónir evra fyrir Sneijder.