Maradona gæti hætt - hvort sem Argentína kemst á HM eða ekki

Diego Maradona stendur nú í stórræðum sem landsliðsþjálfari Argentínu en liðið á í harðri baráttu við að tryggja sér farseðilinn á lokakeppni HM 2010.

Argentína er sem stendur í fimmta sæti þegar tveir leikir eru eftir í undanriðlinum í Suður-ameríku en fjórar efstu þjóðirnar í riðlinum komast beint á lokakeppnina en liðið í fimmta sæti fer í umspil.

Það er þó ekki aðeins innan vallar sem vandræðin hafa skapast hjá Maradona því utan vallar á hann í harðvítugum deildum við Carlos Bilardo, yfirmann landsliðsnefndar argentínska landsliðsins og fyrrum landsliðsþjálfara, en tvímenningarnir talast ekki við.

Maradona var ómyrkur í máli í nýlegu viðtali við argenínska fjölmiðla þar sem hann sagði ýmislegt þurfa að breytast ef hann ætti að halda áfram starfi sínu.

„Ég er auðvitað búinn að samþykkja að gera allt sem í mínu valdi stendur til þess að tryggja Argentínu farseðilinn á lokakeppni HM en það er samt hlutir sem ég hef rekið mig á í þessu starfi sem ég er alls ekki sáttur með. Ef ég á að halda áfram þá verður að taka tillit til þess sem ég vill líka," segir Maradona.

Argentína þarf helst að vinna báða leiki sína, gegn Perú og Úrúgvæ, í riðlinum til þess að gulltryggja farseðilinn til Suður-Afríku á lokakeppnina. Ef það gerist ekki, þá þarf Maradona líklega ekki að hafa áhyggjur af því hvort hann vilji halda áfram eða ekki. Hann yrði pottþétt látinn taka pokann sinn.