Reyndi að brjótast inn vopnaður dúkahníf

Maður vopnaður dúkahníf reyndi að brjótast inn hjá Terr Security öryggisþjónustunni á Hverfisgötu um klukkan sjö í morgun. Stefán Stefánsson, starfsmaður fyrirtækisins, hafði samband við fréttastofu eftir að hafa lesið frétt á Vísi um ótta íbúa við innbrot.

Stefán var á vakt þegar innbrotið átti sér stað. Hann segist hafa orðið var við rosalegan hávaða og farið að gá. Þá hafi náungi hangið í einum glugganum og verið að reyna að spenna hann upp.

Maðurinn hafi hins vegar horfið á braut þegar nágranni tók að öskra á hann. Stefán elti innbrotsþjófinn út, en þurfti frá að hverfa eftir að þjófurinn brá upp dúkahníf. Þá afréð framkvæmdastjóri fyrirtækisins að hringja í lögreglu.

Að sögn lögreglu hefur maðurinn enn ekki fundist.

Stefán segir mikil verðmæti í húsinu, einkum tækjabúnað. Því sé ávallt starfsmaður sem vakti húsið allan sólarhringinn.