Fulham blandar sér í Tevez-málið

Tevez-málinu virðist ekki vera lokið. Fulham hefur ákveðið að sækja mál sitt fyrir dómstólum þar sem liðið telur að árangur West Ham hafi orðið til þess að félagið fékk minna verðlaunafé en ella.

Carlos Tevez lék stórt hlutverk með West Ham í lok leiktíðarinnar 2006-7 en þá bjargaði liðið sér frá falli. Fulham féll ekki en varð í 16. sæti deildarinnar, einu sæti á eftir West Ham. Munurinn á verðlaunafénu er um hálf milljón punda.

Sheffield United féll hins vegar úr deildinni það árið og sótti mál sitt fyrir gerðardómi sem dæmdi United í hag. West Ham og United sömdu um bótagreiðslu fyrr í vikunni.

Hins vegar mun Neil Warnock, fyrrum stjóri United, vera að skoða sína stöðu, rétt eins og Fulham.