Drekinn þarf 70-80 dollara olíuverð

Skip til nákvæmra hljóðbylgjumælinga verður það fyrsta sem olíufélög senda á Drekasvæðið eftir að leyfum verður úthlutað í haust. Síðan kæmu fljótandi leitarborpallar sem gætu þurft tvö til þrjú ár áður en menn ákveða að byggja upp vinnslusvæði. Fyrsta spurningin sem vaknar hjá Íslendingi er hvort það sé yfirhöfuð hægt, lengst útí norðurhöfum.

Forstjórinn hjá Aker Stord, Jan-Tore Elverhaug, segir þá einmitt að vera að smíða pall fyrir svæði sem þetta, fljótandi vinnslupall fyrir StatoilHydro, sem fær það hlutverk að pumpa upp olíu og gasi úti fyrir Noregsströndum. Tvöþúsund metra dýpi á Drekanum er engin hindrun. Íslendingar geti fengið slíkt.

Olíuverðið þyrfti eitthvað að hækka til að svona borgi sig. Sjötíu til áttatíu dollarar tunnan, áætlar Jan-Tore fyrir Jan Mayen-svæðið, svo fremi sem stór og gjöful lind finnist.

Hjá Aker Solutions í Osló sýnir Linda Hanken verkfræðingur okkur dæmi um annarskonar lausn, að í stað fljótandi palls yrði fljótandi vinnsluskip á svæðinu, með lögnum til botns, sem er mikil breyting frá því þegar menn smíðuðu risastóra palla sem náðu 300 metra niður á botn. En hve langan tíma tæki að koma vinnslu í gang?

Frá þeim tíma sem olíulindir finnast og olíufélög teljia svæðið arðbært þarf fjögur ár til að hanna og smíða vinnslupall og koma honum fyrir á svæðinu. Fjögur ár, segir Jan-Tore Elverhaug.