Hiddink óánægður með leikmenn Chelsea

Hollendingurinn Guus Hiddink, stjóri Chelsea, var hundóánægður með sína menn sem misstu af gullnu forskoti í dag að saxa á forskot Man. Utd er liðið tapaði 1-0 fyrir Tottenham.

Þetta var fyrsta tap liðsins síðan Hiddink tók við því.

„Þegar lið eru að elta verða þau að vinna sína leiki. Að fá á okkur mark á þessum tíma með alla þessa atvinnu- og landsliðsmenn er ekki gott fyrir okkur. Menn verða að vita hvenær þeir eigi að slökkva eldinn þegar logar í eldhúsinu," sagði Hiddink svekktur.

„Við misstum af frábæru tækifæri þar sem við vissum að United væri að tapa. Við hefðum getað snúið öllu við í dag en við misstum af því og það er gríðarlega svekkjandi," sagði Hiddink.

Brasilíumaðurinn Gomes átti stórleik í marki Spurs og varði oft frábærlega.

„Hann átti eina vörslu sem var í heimsklassa og hún afgreiddi leikinn," sagði Hiddink.