Barðstrendingar að springa

Nú þegar Ísafjörður er að tengjast Reykjavík með bundnu slitlagi verður Patreksfjörður fjölmennasta byggð landsins sem býr við malarvegi til höfuðborgarinnar. Tveir langir kaflar, alls um áttatíu kílómetrar, eru ómalbikaðir á sunnanverðum Vestfjörðum en vegna slæms ástands vegakerfisins þar hefur Breiðafjarðarferjan Baldur verið látin sigla daglega milli Brjánslækjar og Stykkishólms, og tvisvar á dag á sumrin.

Í gær var tilkynnt að ríkisstyrkur til ferjunnar yrði skorinn niður, nær öllum starfsmönnum sagt upp og stefnt að fækkun vetrarferða niður í þrjár til fimm á viku. Oddviti Tálknafjarðar, Eyrún Ingibjörg Sigþórsdóttir, óttast afleiðingarnar fyrir sjávarútveginn í Vestur-Barðastrandarsýslu sem nýtir ferjuna til daglegra fiskflutninga í tengslum við flug frá Keflavík.

Þetta bætist ofan á ákvörðun stjórnvalda fyrr á árinu að strika yfir allar fjárveitingar til vegabóta og segir Eyrún að fólk sé að springa. Þetta sé algjörlega óþolandi.

Hún segir að nú þegar rætt sé um að lífeyrissjóðir taki þátt í vegaframkvæmdum sé horft á suðvesturhornið og spyr hversvegna ekki sé horft til landshluta sem hafi algerlega setið eftir síðastliðin tíu ár.