Fréttablaðið verður fáanlegt um allt land

Stefnt er að því að Fréttablaðið verði aðgengilegt um land allt eftir breytingar á dreifingu þess í lok mánaðarins. Blaðinu hefur ekki verið dreift svo víða áður.

Miðað við núverandi upplagstölur verður samdráttur í frídreifingu um þrjú prósent af upplaginu en miðað við undirtektir við hugmyndir um lausasölu á kostnaðarverði má búast við að heildaráhrifin verði þau að upplagið aukist nokkuð frá því sem nú er. Fréttablaðinu verður dreift frítt á helstu þéttbýlisstöðum suðvesturhornsins: á Reykjanesi, Akranesi, í Borgarnesi og Árborg og áfram borið í hús á höfuðborgarsvæðinu og á Akureyri.

Frídreifing Fréttablaðsins mun því áfram ná til um 85 prósent landsmanna. Á öðrum stöðum verður hægt að fá blaðið í lausasölu á kostnaðarverði.

Eins og fram kom í Fréttablaðinu í fyrradag eru breytingarnar á dreifingu blaðsins gerðar vegna efnahagsþrenginganna sem nú ganga yfir.

Auglýsingamarkaðurinn hefur dregist það mikið saman að hann stendur ekki undir jafn stóru upplagi og jafn víðtækri dreifingu og áður, auk þess sem staða krónunnar hefur aukið pappírskostnað til muna.

Söluaðilar Fréttablaðsins á landsbyggðinni munu fá hvert blað á kostnaðarverði.

Eins og fram hefur komið hefur verið gengið frá samningum við N1 um að bjóða viðskiptavinum Fréttablaðið. Fleiri sölustaðir munu bætast við áður en breytingarnar koma til framkvæmda og verða kynntir jafnóðum í blaðinu.

Þeim sem hafa áhuga á að taka Fréttablaðið til dreifingar á landsbyggðinni er bent á að setja sig í samband við Pósthúsið í síma 585 8300. Áfram verður hægt að fá Fréttablaðið í fullri áskrift utan hefðbundins dreifingarsvæðis. Það kostar 2.890 krónur á mánuði .

Blaðið fæst frítt í rafrænni áskrift í tölvupósti, auk þess sem það er aðgengilegt ókeypis á Vísi.is.